Muungano wa upinzani unaoongozwa na Rigathi Gachagua na Kalonzo Musyoka unamtafuta Gavana wa Siaya James Orengo kama mgombea mwenza ili kuvutia uungwaji mkono kutoka eneo la Luo Nyanza. Vyanzo vya ndani vinasema Orengo anathaminiwa kwa uzoefu wake wa kisiasa na msimamo thabiti dhidi ya uhusiano wa ODM na serikali. Hata hivyo, hatua hii inaweza kuwa hatari ikiwa eneo la Nyanza litabaki na Rais William Ruto.
Muungano wa upinzani unaoongozwa na aliyekuwa Naibu Rais Rigathi Gachagua na kiongozi wa Wiper Patriotic Front Kalonzo Musyoka unawania kumteua Gavana wa Siaya James Orengo kuwa mmoja wa vinara ili kuvutia uungwaji mkono kutoka eneo la Luo Nyanza. Vyanzo vya ndani ya muungano huo viliambia Taifa Jumapili kwamba Orengo anamezewa mate na upinzani kutokana na uzoefu wake wa kisiasa na msimamo thabiti kuhusu uhusiano wa chama cha ODM na serikali ya Rais William Ruto.
Vyanzo vimefichua kuwa Orengo anawaziwa kuwa mgombea mwenza katika muungano mpya unaoleta pamoja Gachagua, Kalonzo Musyoka, Martha Karua wa Chama cha People’s Liberation Party, Eugene Wamalwa wa DAP-Kenya, Justin Muturi wa Chama cha Democratic Party, na chama cha Jubilee cha Rais mstaafu Uhuru Kenyatta kinachowakilishwa na aliyekuwa Waziri wa Usalama wa Ndani Fred Matiang’i.
Hata hivyo, kwa Orengo, kujiunga na muungano kama huo kutakuwa ni kamari hatari ya kisiasa ikiwa eneo la Nyanza litaamua kubaki na Ruto katika mfumo wa serikali pana. Kaimu Kiongozi wa ODM Dkt Oburu Oginga amesisitiza kwamba mustakabali wa kisiasa wa eneo hilo bado uko wazi, na kwamba ODM hakiwezi kukubali chochote chini ya naibu rais katika uchaguzi wa 2027 iwapo kitaungana na chama kingine.
Orengo ni miongoni mwa washirika wa karibu wa aliyekuwa kiongozi wa upinzani Raila Odinga, ambao wameonyesha kuwa wangeachana na Ruto na badala yake kushirikiana na Musyoka katika uchaguzi wa 2027. Baadhi ya wanajamii wa familia ya Odinga, wakiongozwa na Mbunge wa Kisumu Ruth Odinga, mjane Ida Odinga na Orengo, wanamuona Musyoka kama mtu anayeweza kuaminika kuendeleza urithi wa Odinga.
Hii inaweza kuwa pigo kwa Ruto, ambaye anatarajia kurithi wafuasi wa Odinga baada ya makubaliano yaliyosababisha serikali pana. Katika ziara ya kibinafsi ya ujumbe wa Wiper katika shamba la Opoda na Kang’o ka Jaramogi huko Bondo Alhamisi, viongozi walimiminia sifa Musyoka, akimtaja Odinga kama “ndugu, mwenza kwenye mapambano, na kamanda ambaye aliyepaswa kuwa kiongozi wa Jamhuri ya Kenya.”