Wanasiasa wakuu kutoka vyama vya ODM na UDA waliounga mkono wagombeaji wa upinzani katika chaguzi ndogo wiki jana wanakabiliwa na hatua za kinidhamu. Duru zinaeleza kuwa wanaweza kupokonywa nafasi za uongozi au kutimuliwa kutoka vyama vyao. Serikali Jumuishi inalenga kurekebisha uongozi wa kamati za Bunge ili kuakisi mpangilio mpya wa kisiasa.
Baada ya chaguzi ndogo katika maeneo 24 ya uwakilishi, Serikali Jumuishi imeshinda viti vingi licha ya upinzani kutoka Muungano wa Upinzani unaoongozwa na Rigathi Gachagua na Kalonzo Musyoka. Hata hivyo, baadhi ya wanachama wa UDA na ODM waliunga mkono wagombeaji wa upinzani, na sasa wanalengwa na shoka.
Wanachama wanaolengwa ni pamoja na Naibu Gavana wa Homa Bay Oyugi Magwanga, Kiranja wa Wengi katika Seneti Boni Khalwale, na wabunge Mohamed Ali wa Nyali, Anthony Kibagendi wa Kitutu Chache Kusini, Clive Gesairo wa Kitutu Masaba, Majimbo Kalasinga wa Kabuchai, na Caleb Amisi wa Saboti.
Katika Homa Bay, Magwanga alimpinga Gavana Gladys Wanga kwa kumfanyia kampeni Philip Aroko, mgombeaji huru, badala ya Boyd Were wa ODM katika uchaguzi mdogo wa Kasipul. Alikuwa ameisuta Were wakati wa kura ya mchujo. Viongozi wa ODM, ikiwa ni pamoja na Wanga, wameanzisha shinikizo la kumtaka ajiuzulu. “Mtu hawezi kuhudumia serikali yako na wakati huo kuongea vibaya kuhusu utawala,” Wanga alisema.
Katika Kakamega, Khalwale aliwapa debe Seth Panyako wa DAP-K na David Ndakwa wa UDA katika Malava. Ali, kwa upande wake, alimunga mkono Stanley Kenga wa DCP katika Magarini, Kilifi, wakati UDA ilimuunga mkono Harrison Kombe wa ODM aliyeshinda.
Katibu Mkuu wa UDA Hassan Omar amewataka wabunge kama hao wajiuzulu na kujiunga na vyama walivyoiunga mkono. Duru zinaeleza kuwa UDA inalenga kumpokonya Khalwale wadhifa wa Kiranja wa Wengi, na Ali nafasi ya Kamishina wa Tume ya Huduma za Bunge.