Nakipag-ugnayan ang Department of Trade and Industry sa mga tagagawa upang hindi magtaas ng presyo ang mga basic goods hanggang katapusan ng taon. Ayon kay Trade Secretary Cristina Roque, sumang-ayon na ang lahat ng mga tagagawa rito. Ito ay bahagi ng direktiba ni Pangulong Marcos upang mapanatiling abot-kaya ang mga essential goods sa holiday season.
Sa isang pahayag, sinabi ng DTI na sa kamakailang Consumer Welfare Month Stakeholders’ Appreciation Night, hiniling nito sa mga tagagawa na tulungan panatilihin ang kasalukuyang presyo ng mga basic necessities at prime commodities hanggang katapusan ng taon. “There will be no price increase for basic necessities and prime commodities until the end of the year. All manufacturers have agreed to this,” sabi ni Roque sa isang Viber message noong Lunes.
Patuloy ang koordinasyon ng ahensya sa mga tagagawa at retailer upang mapanatili ang suggested retail prices. Bagaman nakuha na ang suporta para sa mga basic goods, ongoing pa ang usapan tungkol sa mga Noche Buena items. “We are still in talks with the manufacturers, but we will inform the public next week,” ani Roque.
Kasama sa basic necessities ang canned sardines, gatas, kape, tinapay, noodles, asin, detergent o laundry soap, bottled water, at kandila. Samantala, ang prime commodities naman ay kinabibilangan ng canned meat products, condiments, toilet soap, at batteries.
Hinihikayat ng DTI ang mga konsumer na mag-ulat ng anumang paglabag o overpricing sa pamamagitan ng DTI Consumer Care Hotline (1-DTI o 1-384) o sa email na [email protected] o [email protected].