Junior Stars ya Kenya inahitaji ushindi mmoja tu kufuzu kwa AFCON 2026 ya wachezaji chini ya miaka 17. Leo wanapokutana na Tanzania katika nusu fainali uwanjani Abebe Bikila, Addis Ababa nchini Ethiopia. Washindi watafuzu moja kwa moja kwa michuano hiyo nchini Morocco.
Mechi ya nusu fainali kati ya Junior Stars ya Kenya na Tanzania inafanyika leo kuanzia saa mbili usiku uwanjani Abebe Bikila, Addis Ababa nchini Ethiopia. Mapema katika uwanja huo, Ethiopia itapambana na Uganda saa kumi na moja jioni. Washindi wa nusu fainali hizi mbili na timu itakayomaliza nafasi ya tatu watafuzu kwa AFCON 2026 nchini Morocco, ingawa tarehe za michuano bado hazijatangazwa.
Kenya walifikia hatua hii baada ya kumaliza nafasi ya pili katika Kundi A kwa pointi saba, nyuma ya Ethiopia kwa pointi tatu. Walipata sare 1-1 dhidi ya Somalia, ushindi 2-1 dhidi ya Rwanda, na 2-0 dhidi ya Sudan Kusini, lakini walipoteza 1-0 dhidi ya Ethiopia. Tanzania, kwa upande wake, waliongoza Kundi B bila kushindwa, wakipata pointi 12. Waliwashinda Uganda 2-1, Sudan 6-0, Burundi 5-0, na Djibouti 11-0.
Tanzania wameonyesha ufanisi mkubwa, wakifunga mabao 24 na kuruhusu bao moja tu, ikilinganishwa na Kenya ambao wamefunga matano na kuruhusu mawili. Kocha William Muluya wa Kenya alisema, “Mshindi anafuzu moja kwa moja kwa AFCON. Tunaelewa tunakabiliana na mpinzani mgumu ambaye anapigiwa upato sana kushinda kushinda, lakini dakika 90 zitaamua.” Aliongeza kuwa maambukizi ya mafua yameathiri wachezaji wengi, na madaktari wanafanya juhudi, huku wachezaji kadhaa wenye majeraha madogo, ikiwa ni pamoja na muhimu, wakishauriwa kuanza kutoka benchi.
Kocha wa Tanzania, Elieneza Nikolaus, alisema, “Tunafurahi kufikia hatua hii, ambayo tumekuwa tukisubiri sana. Tunakabiliana na ndugu zetu, Kenya, na ni jambo la kitaifa huku kila mtu akijiandaa. Timu bora na ishinde.”