Felix Senet Takona, mwanafunzi wa umri wa miaka 17, yuko hatarini kukatwa miguu baada ya kupigwa na kumwagiwa asidi na polisi wakati akiwa kizuizini. Alikamatwa Oktoba 10, 2025, kwa tuhuma za wizi na sasa anapambana kwa maisha yake hospitalini. Polisi wanasema wanachunguza tukio hilo.
Felix Senet Takona, mwanafunzi wa kidato cha pili mwenye umri wa miaka 17, alikamatwa Oktoba 10, 2025, saa nane mchana katika kituo cha kibiashara cha Naroosura, kaunti ndogo ya Narok Kusini, kwa tuhuma za kuiba vipuri vya tingatinga. Akiwa kizuizini katika kituo cha polisi cha Naroosura, alidaiwa kupigwa na polisi wawili waliofunga minyororo na kumwagiwa kemikali anachoshuku ni asidi miguuni. "Nilikamatwa saa nane mchana mnamo Oktoba 10 katika kituo cha kibiashara cha Naroosura. Nikiwa kuzuizuni polisi wawili walinifunga kwa minyororo wakanipiga na kunijeruhi ili nikiri makosa ambayo sikuyatenda," alisema Felix akiwa hospitalini, akiwa na pingu mkononi huku akilindwa na polisi.
"Walinimwagiwa asidi miguuni na kukataza familia yangu isinifikie. Nilipigwa kila usiku nikiwa kizuizini na walikuwa wakiniambia nikubali mashtaka dhidi yangu ama waniue," aliongeza. Alihamishwa kituo cha polisi Oktoba 12, na Oktoba 13 alifikishwa mahakamani ambapo mashtaka yalibadilishwa kutoka kuiba vipuri vya tingatinga hadi kuingia jengoni na kuiba. Hakimu aliamuru apelekwe hospitali ili atibiwe kabla ya mashtaka kuwasilishwa rasmi.
Siku iliyofuata, akashtakiwa kwa kuvunja duka na kuiba lita 10 ya mafuta ya kupikia yenye thamani ya Sh2,500 pamoja na pesa taslimu Sh34,000. Madaktari katika Hospitali ya Rufaa ya Kaunti ya Narok wamesema majeraha yake ni mabaya na huenda ikabidi mguu ukatwe ili kuokoa maisha yake. Wiki mbili baadaye, Felix bado anapambana kusalia hai hospitalini.
Kamanda wa polisi wa Kaunti ya Narok, Riko Ngare, alisema polisi wanachunguza kisa hicho kwa lengo la kubaini ukweli. Tukio hili linaangazia madai ya ukatili wa polisi dhidi ya vijana katika maeneo ya kaunti.