Simulang Marso 23, magbibigay ng diskwento sa toll ang mga concessionaire para sa mga public utility vehicle, bus at serbisyo sa freight ng dalawang buwan, ayon sa Department of Transportation. Layunin nito na mapagaan ang epekto ng pagtaas ng presyo ng gasolina dahil sa krisis sa Middle East.
Inihayag ng Department of Transportation (DOTr) na magsisimula sa Marso 23 ang pagpapatupad ng mga pribadong concessionaire ng diskwento sa toll para sa Class 1 PUVs o jeepney, Class 2 PUBs, at Class 3 vehicles na ginagamit sa freight services kabilang ang logistics at essential goods. Ayon sa DOTr, ito ay sumusunod sa direktiba ni Pangulong Marcos upang matugunan ang epekto ng pagtaas ng presyo ng langis dahil sa krisis sa Middle East. Sa liham ni Toll Regulatory Board executive director Jay Art Tugade kay DOTr Secretary Giovanni Lopez, sinabi nito na kusang magbibigay ng temporaryong diskwento ang mga tollway operators para sa essential transport sectors. Nagpasalamat si Lopez kina Ramon Ang ng San Miguel Corp. at Manny Pangilinan ng Metro Pacific Tollways Corp. (MPTC) sa tulong na ito, na magsisilbing suporta sa mga driver, commuters, consumers at businessmen. Magkakabisa ito ng dalawang buwan muna at maaaring i-extend pagkatapos ng review. Sa pamamagitan ng weekly rebates, makakatipid ng hanggang P18 ang Class 1 vehicles, P47 ang Class 2, at P72 ang Class 3 bawat end-to-end trip. Para sa MPTC sa NLEX, ang KaBiyahe program mula Marso 23 hanggang Mayo 22 ay para sa accredited PUBs, modernized jeepneys at Class 3 vehicles na may valid Easytrip at hindi enrolled sa ibang programs. Bukod dito, magkakaroon din ng 50% diskwento sa MRT-3 at LRT-2 simula rin sa Marso 23.