Mahakama Kuu imesitisha kwa muda mpango wa serikali wa kuanzisha kituo cha Ebola chini ya makubaliano na Amerika. Amri hiyo ilitolewa saa chache baada ya Washington kutangaza ufadhili wa mamilioni ya shilingi.
Mahakama Kuu Nairobi ilitoa amri za muda zinazozuia serikali kuanzisha au kuendesha kituo chochote cha Ebola katika kaunti ya Laikipia. Amri hizo zinazuia pia kupokea waathiriwa wa ugonjwa huo chini ya makubaliano hayo.
Shirika la Katiba Institute lilishtaki serikali likisema makubaliano yalifikiwa bila ushirikishaji wa wananchi au Bunge. Lilieleza kuwa Kenya ina miundombinu duni ya kushughulikia virusi hivyo vinavyohitaji maabara za kiwango cha BSL-4.
Amerika ilitangaza kutoa Sh1.7 bilioni kwa Kenya na Sh14.4 bilioni kwa kanda hii ili kukabiliana na mlipuko wa Ebola. Mazungumzo yalifanyika kati ya Rais William Ruto na Waziri Marco Rubio.
Serikali imeagizwa kujibu hoja hizo kabla ya kesi kusikilizwa tena Juni 2. Mahakama ilikubali kesi hiyo kuwa ya dharura.
