Gavana wa Murang’a Dkt Irungu Kang’ata alitetea uamuzi wake wa kuhudhuria mkutano wa Linda Mwananchi mjini Thika. Hatua hiyo imezua mjadala wa kisiasa katika eneo la Mlima Kenya kuelekea uchaguzi wa 2027.
Katika mahojiano kwenye runinga ya Inooro, Kang’ata alisema hatua yake ilikuwa sehemu ya mikakati yake ya kisiasa ili kuwakilisha maslahi ya Mlima Kenya. Alisisitiza kuwa eneo hilo halipaswi kuachwa nje ya uwakilishi ndani ya vuguvugu hilo.
Alikanusha madai ya kujitayarisha kuwa kigogo wa siasa za Mlima Kenya, kugombea urais au nafasi ya naibu rais, ama kuanzisha chama. Alisema anafahamu kuwa DCP ndicho chama maarufu zaidi Murang’a na Rigathi Gachagua ndiye kiongozi wa siasa za eneo hilo.
Mdadisi wa masuala ya kisiasa Stanley Wang’ombe alimshutumu Kang’ata kwa kujaribu kuamua mwelekeo wa kisiasa wa Mlima Kenya bila kushirikiana na wengine. Waziri wa Ardhi Alice Wahome pia alimkosoa gavana huyo wakati wa ziara zake Murang’a.
